Job 8

Bildatgo polasa pusali po

(Dąį 8)

Dwai bidi dabe bobobage sogo bidigobe

1 Jopgo po ola silibo si, tama Bildat te Suha bulu tǫ bidigo agabolo e tama wali.

2 “Te bage. Nago po da, dwai goli da,
mena sogo nago te kolesaga tagalaibawe?
Nago po wabo te wali subigila pabo tiwai dao.
3 Godigo tigidali bomo elalubo,
te doloba pai kolesaga hasegelama,
tama da kegebo meni. Mu menima.
Tigidali sogo agai kolesaga doloba pai naga dao.
4 Tialima, nago wai pulubago dwai sę ebaso,
agai augwa sęgę wei ponani bogo.
5 Tiali goli, naga Godibolo gedu haluasa po wao.
Agai tigidali bomo elalubo, tama nago
agabolo nage hobede emainu ya.
6 Ma, nage Godigo gedude doloba pelama,
magi sę me isąwai da, teda God
aselama, nage tau sagasaibao.
Teda aga nage bugagia nago bede bidimainu ilaiba,
te polobadu bidali yali gilama.
7 Tama agai nagebolo nai dabe hauwa mu
mawaibao, te polobadu nago elaluali nai
mu edelaibao.
8 Nago polobadu bidali genuai bidi dabego
dwagi yai doloba pai kolesaga page nago gega suao.
Tama polobadu wąį dabego kolesaga me osola suao,”
wali.
9 “Magi baso meni. Da tǫde pęwadage sogo
bidibo dao,
te bidigo tigi noma te tǫde osogo
elalubo tiwai bidibo dao.
Tama polo tama hagawaibao.
Dago dwasianu kolesaga naga elalubo.
10 Polobadu bidi dabego dwagi yai kolesaga dali
dwagi yai homu elaluali,
tama augwaligo nage ola mawaibao,” wali.
11 “Augwaligo po meba e tama dao.
Me badu tǫde wę menia digi da,
te bulu awi me nosai da bugagia me hologobeo.
Meni.
Augwali te wę hauwa elalubo digi da,
teda te awi dabe nosai dabe genuai mu holaibao.
12 Tiali goli, wę sula sabo si da,
tama te awi dabe te nosai dabe genuai holobo meni,
tibo si bidigo tagabo usu ebo menio.
Augwali hogodo elalubadi, augwa ma sisibo dao.
Te me badu nosai dabe polo sasia pisąma
ebo te nosai dabe ebo gilama.
13 Te bidi dabe te God tudiba mubo bidi dabe
augwali te nosai dabe tiwai dao.
Te bidi dabego augwa dolabo sunumi wali pabo dao.
Augwaligo homugo tibo meni,
augwali bugagia bidiba homu egobeo. Menio.
Augwali olo tama hagawaibao.
14 Augwa homugo da, augwali
bugagia bidaiba homu ebo dao.
Tiali goli, augwaligo te homu ebo da,
te olo dali geda mubo dao.
Augwali te kolesaga umawai meni yai bidi da,
te be tolaluabo homu ebo tiwai dao.
Te hologabe gagalama, be sigiba holobo dao.
Tiali goli, te hologabe dabego be polo hųgia pabo da,
tama augwali subigila tulalubo dao.
16 Hasia da, te bidi dabe augwali
dila pai nosai tǫde elalu tiwai elaluai dao.
Augwali wę hauwa elaluyu, tama bugagia holama,
tama augwaligo pedali dabe tigidali tǫde usu yali.
17 Tama masigi dude bomonama dąų wala sali.
18 Tiali goli, bidigo te nosai gudubo sogo da,
teda bidi mego konegobeo, polobadu tede dila
nosai
elaluai digi da homu egobe.
19 Mu tama, bidi dabego God tudiba mubo dao.
Augwaligo wei ebo kolesaga pęwadage mu dao.
Tama augwali isibo sogo,
te gasa bidi dabe pedalama,
te bidi dabego bidali pesage saibao,” wali.
20 “Ma, te bidigo doloba pai kolesaga wali peyu,
tama Godigo gedude dwai sę me isąma yali da,
teda Godigo aga tudiba me iligobeo.
Tiali goli, bidigo dwai kolesaga ebaso da,
teda Godigo aga tau sabo usu egobeo.
21 Megi da, Jop, Godigo nago kolesaga
doloba pai suali da,
agai nage homu wiegi yai ilaibao.
Tibaso, nage wiegi yai homu elama,
nage gisugu ma weyu, hai waibao.
22 Tama agai bidi dabe nage
wei isąma yali bidi dabe aiyaba ilaibao,
tama augwa moni hale mu yaibao.
Tama te dwai kolesaga ebo bidi da,
teda augwali hagawaibao,
augwa te nai dabe dali sese hagawaibao,”
te bidi Bildatgo Jopbolo te po wali.